Hvalastøðin við Áir letur upp aftur í summar
Fríggjadagin tann 29. mai letur Tjóðsavnið aftur upp á Hvalastøðini. Hvalastøðin við Áir hjá norsk-skotsku fyritøkuni Christian Salvesen í Leith í Skotlandi byrjaði sítt virki í 1905. Hon er tann einasta av teimum sjey norsku hvalastøðunum í Føroyum, sum er varðveitt. Hvalastøðin við Áir er ein týðandi og einstakur ídnaðararvur í Føroya søgu.
Verkætlanin at varðveita hvalastøðina við Áir byrjaði í 2011. Hetta arbeiðið er enn í gongd, men til ber kortini at síggja støðina.
Húsini og bygningarnir eru t.d. Ebenezer, Kristnastova, Fugan, Kvernan og Tørkan. Eisini eru beinknúsarar, spøl, lýsitangar, mjølverksmiðja, smiðja og Planurin at síggja. Hús og bygningar standa sum varðar frá einari farnari tíð. Ein framsýning um hval og hvalaveiðu er eisini at síggja inni í Smiðjuni.
Hvalastøðin er ídnaðar- og vinnulívssøgan um Salvesen í Skotlandi, Pf. við Áir, Pf. Sperm og Pf. Hvalarakstur. Tað síðsta virkna felagið á Hvalastøðini var hjá Hermansen-brøðrunum í Hósvík.
Opið er
Fríggjadag, leygardag og sunnudag frá 10-17.
Atgongugjald
Børn 0-16 ár ókeypis
Vaksin 60 kr.
Pensiónistar 30 kr.
Bólkar 40 kr. fyri hvønn
Rundvísing 20 kr. fyri hvønn
Eykagjald fyri vitjan uttanfyri vanliga upplatingartíð 400 kr.
Rundvísing er tríggjar ferðir um dagin kl. 11.00, 13.00 og 15.00. Bílegg pláss á telefon 340 505 ella savn@savn.fo
