PLantudeildin

Ábyrgdarøkið hjá plantudeildini er at savna inn, skráseta, varðveita, granska og miðla plantulívið í Føroyum, bæði í sambandi við flokkanarfrøði og vistfrøði.

Á plantusavninum eru uml. 40.000 skrásetingar, sum eru teldutøkar. Tær eru er av høgum plantum, skónum, mosum, soppum og tarum. Tað mesta av teimum eru føroyskar plantur, har tann størsti parturin er frá 1960 og 61. Harumframt er eitt stórt savn av útlendskum plantum og eitt savn av føroyskum skónum, mosum og tarum. Umframt eisini gløs við pollensýnum frá granskingarvirkseminum hjá Jóhannes Jóhansen.

Plantudeildin granskar í broytingum í plantuvøkstrinum herundir sambandinum millum vøkstur og veðurlag, árinið av seyðabiti á plantuvøksturin og broytingar í útbreiðsluni av plantusløgum.

Av størri granskingarverkætlanum, sum hava verið gjørdar á savninum kunnu nevnast verkætlan um vakstrarsøguna, ið røkkur frá ístíðini fram til okkara tíð, og ein verkætlan, ið hevur til endamáls at kanna sambandið millum veðurlag og fjallavøkstur, umframt verkætlanin vakstrarbeltir og veðurlag.