Heysthugni á Tjóðsavninum í heystfrítíðini
Í ár royna vit nakað nýtt og skipa fyri eini viku við heysthugna á Tjóðsavninum.
Ein vika har dentur verður lagdur á upplivingar, framløgur og framsýningar til børn í skúlaaldri.
Framsýningin í Brekkutúni 6 er opin hvønn dag millum kl. 11 og 16.
Hvat er á skránni?
“Vís og greið frá”-framløga er hvønn dag klokkan 13.30. Ymisk starvsfólk á Tjóðsavninum greiða frá og vísa ymiskt fram, ið er knýtt at arbeiði teirra. Framløgurnar eru á leið 10-15 minuttir og eru ætlaðar børnum.
“Vís og greið frá”-framløgur
Mánadagin 9/10: “Hvat er og ger ein fornfrøðingur” Ann Sølvia greiðir frá.
Týsdagin 10/10: “Døglingarnir í Kaldbak” Áki greiðir frá.
Mikudagin 11/10: “Kappróður” Kristina greiðir frá.
Hósdagin 12/10: “Hvat ger ein fuglafrøðingur” Jón greiður frá.
Fríggjadagin 13/10: “Hvat ger ein savnsvarkitektur” Meduna greiður frá.
Uppgávuhefti og kreativar verkstovur
Hóast vit royna ein nýggjan leist við heysthugna á Tjóðsavninum, bjóða vit sjálvandi børnunum, ið vitja, vælkenda uppgávuheftið at loysa á savninum. Í tveimum hugnaligum verkstovum kunnu listarligu gávurnar roynast við at klippa og klistra.
Stórt - men smátt!
Í sjóneykunum sært tú tað stóra í tí smáa. Tað er møguligt at royna sjóneykurnar hvønn dag – vit hava føroysk kykt og plantur.
Útgrevstur
Hevur tú ein dreym um at royna teg sum fornfrøðing? Kom og royn okkara uttanduraútgrevstur. Finn millum annað perlur og myntir frá víkingatíð. Í móttøkuni verður eitt skjal við lutunum, ið finnast skulu, flýggjað út. Tá tú hevur funnið allar lutirnar, letur tú skjalið inn aftur í móttøkuni og fært okkurt søtt til góman.
Serstakir lutir
Millum serligu lutirnar, ið síggjast kunnu til heysthugnan, er kistilin hjá Guttormi í Múla. Tað segðist, at Guttomur var stinnur í gandi. Ein gandabók frá 1700 og ein grýluskortur úr viði, sum er yvir hundrað ára gamal, verða eisini sýnd fram.
Heysthugnin á Tjóðsavninum er ókeypis. Vit gleða okkum at njóta heystfrítíðina á Tjóðsavninum saman við tykkum.
Barbiedukkuinnsavning
9. mars í 2024 verður Barbie 65 ár. Vit hava ætlanir um at hátíðarhalda stóra dagin hjá Barbie við eini serframsýning, har Barbie, vinir hennara og tilhoyr vera í fokus.
Í hesum sambandi fer Tjóðsavnið at savna inn Barbiedukkur og tilhoyr í heystfrítíðini og komandi mánaðin. Tjóðsavnið eigur onga Barbiedukku á goymslu sínari og tað gongur ikki!
Vit hava lænt dukkur og tilhoyr og sett eina lítla Barbieframsýning upp – ein ljósareyður brellbiti til 9. mars 2024.
Hvat er Museum Obscurum?
Museum Obscurum er eitt spildurnýtt kvøldartiltak, sumTjóðsavnið skipar fyri. Tað hóskar seg til børn í aldrinum 10 ár og eldri.
Til Museum Obscurum fáa tit eina øðrvísi rundvísing í myrkrinum. Duldu og óhugnaligu lutirnir eru í fokus. Rundvísingin verður leidd av royndum frásøgufólki.
Eftir rundvísingina verður bjóðað til klassikarabio.
Eitt stuttligt og øðrvísi kvøld á savninum, ið hóskar væl til eldri børn ella familjur.
Tiltakið er ikki hóskandi fyri yngri børn.
Vilt tú at luttaka?
Send okkum ein teldupost á vakt@savn.fo
Avmarkað atgongd er til tiltakið. Freistin at melda til er sama dag fyri klokkan 16.
Filmsskrá
Mándagin 9/10 Hocus Pocus
Týsdagin 10/10 Goonies
Mikudagin 11/10 Hook
Hósdagin 12/10 Beetlejuice
Fríggjadagin 13/10 Gremlins
Ókeypis tiltak fyri eldri børn ella familjur í heystfrítíðini.
Nær: 9.-13. oktober millum kl. 19.30 og 22.30
Hvar: Tjóðsavnið, Brekkutún 6
Krevur tilmelding: vakt@savn.fo
Hvussu nógv: 25 fólk
Málbólkur: Børn frá 10 árum og eldri, foreldur og børn.
Samband
